По пауза од неколку сезони италијанскиот гигант Интер конечно се врати во елитното европско друштво. „Нероазурите“ благодарение на одличната ланска сезона се изборија за учество во Лигата на шампионите, овој „кам-бек“ го најавија со историскиот погодок на нашиот Горан Пандев од пред седум години.
Тогаш, македонскиот репрезентативец постигна мајсторски гол на „Алијанц Арената“, кој беше одлучувачки за победата на Интер од 2-3 и пласманот во четвртфиналето на Лигата на шампионите.
„Назад во Лигата на шампионите! Пандев против Баерн Минхен. Каков кам-бек“, пишува на официјалниот Фејсбук профил на Интер.
Италијанскиот великан во групата фаза во овогодишното издание на Лигата на шампионите ќе се сретне со екипите на Барселона, ПСВ Ајндховен и Тотенхем, а своето деби ќе го има за пет дена кога на свој терен ќе го пречека лондонскиот тим предводен од Маурицио Почетино (18:55 часот).
