Струмичанецот Марко Кренков освои олимписка пофалба на 33. Балканска олимпијада по информатика, која се одржува од 14 до 20 септември во Тирана, Албанија. Како дел од македонскиот тим, тој настапи во силна регионална и меѓународна конкуренција на овој престижен натпревар во програмирање за средношколци.
На годинашното издание учествуваат натпреварувачи од 13 земји членки на Балканската олимпијада и претставници од уште пет гостински земји. Учесниците индивидуално решаваат алгоритамски проблеми во текот на два натпреварувачки дена, при што ги покажуваат своите знаења, логичко размислување и програмерски вештини.
Кренков го обезбеди своето место во македонскиот тим преку целогодишниот циклус натпревари организиран од Здружението на информатичарите на Македонија, со поддршка на Факултетот за информатички науки и компјутерско инженерство – ФИНКИ.
Освоената олимписка пофалба е значајно признание за младиот струмичанец и неговиот труд во областа на информатиката. Со својот настап во Тирана, Марко ја претстави Струмица на меѓународната натпреварувачка сцена и придонесе кон успехот на македонскиот тим.
