Од 28 април бензините ќе бидат поскапи за 2 денари по литар, дизелот ќе поевтини за 2,5 денари, а екстра лесното масло за домаќинство за 1 денар.
Регулаторната комисија за енергетика донесе нова одлука за цените на нафтените деривати, со која во просек тие се зголемуваат за 0,40 проценти во однос на претходната одлука.
Според новата пресметка, од 28 април 2026 година, од 00:01 часот, бензинот ЕУРОСУПЕР БС-95 ќе се продава по цена од 82,50 денари за литар, додека ЕУРОСУПЕР БС-98 ќе чини 84,50 денари за литар.
Цената на дизел горивото ЕУРОДИЗЕЛ БС (Д-Е V) ќе изнесува 91,50 денари за литар. Екстра лесното масло за домаќинство ЕЛ-1 ќе се продава по 96 денари за литар, а мазутот М-1 НС ќе чини 46,656 денари за килограм.
Со најновата одлука, бензините поскапуваат за 2 денари по литар, додека дизелот поевтинува за 2,5 денари по литар. Екстра лесното масло се намалува за 1 денар по литар, а мазутот бележи благо зголемување.
Од Регулаторната комисија појаснуваат дека промените се резултат на движењата на референтните цени на светските пазари. Бензините бележат раст, додека кај дизелот и дел од другите деривати има намалување. Минимално влијание има и курсот на денарот во однос на американскиот долар.
Надлежните потсетуваат дека станува збор за максимални цени, а трговците имаат можност да ги формираат и пониско од утврденото ниво.
