Д-р Никола Маџунков, советник во Советот на Општина Струмица од редовите на ВМРО-ДПМНЕ, остро реагираше на како што вели, расипничките и неразумни проекти што се спроведуваат во Струмица под плаштот на „големи инвестиции“. Тој посочи дека т.н. социјална населба која со години се најавува, наместо решение за граѓаните, прераснува во бетонска пустелија и еколошка закана за градот.
„Да направиш бетонски ѕидови, вистински ‘Кинески ѕид’ над Струмица, за кој и самиот Државен завод за ревизија има утврдено дека нема јасни пресметки за количини на бетон, е чиста неодговорност,“ истакнува Маџунков, додавајќи дека се трошат милионски суми народни пари, а резултатот е празна полјана, со асфалтирана улица, веќе ограбени шахти и без никаква конкретна полза за граѓаните.
Според него, додека се градат ѕидови во празнини, централните и периферните улици во Струмица се распаѓаат.
„Во 2024 година има милиони денари помалку реализација во буџетот за одржување на улици во Струмица. За јавно осветлување се реализирани 5 милиони денари помалку од планираното, а за канализација скоро 50% помалку. Тоа се реални бројки кои говорат за неспособноста и приоритетите на актуелната локална власт,“ предупредува тој.
Маџунков посебно ја потенцира опасноста од новите градежни интервенции на ридот над градот.
„Со изградбата на овој огромен ѕид над цела Струмица, без никаква заштита од дождови и без еколошки план, се отвора потенцијална опасност од поплави и уништување на природата. Наместо да се пошумува, ридот се соголува, а градот се изложува на уште поголеми ризици.“
Тој истакна и апсурдот во поставувањето на мрежа за осветлување на улица што води кон никаде, додека децата играат во мрак во центарот на градот.
„На празна полјана има осветлување, а на игралиштето во градскиот парк, кое секојдневно го користат десетици деца, сè уште нема ниту една светилка. Зарем тоа е приоритетот на оваа локална власт?“ прашува Маџунков.
На крајот, Маџунков заклучува:
„Тоа е сериозно ‘добра зделка’ и ‘голем проект’, ама не во интерес на Струмица и народот. Поради ваквите проекти, сите деца и млади ни се иселија. Градот полека се празни, а ветувањата остануваат само на хартија,“ – дециден е Д-р Никола Маџунков.
