Општинските инспекциски служби затекнале големо количество градежен отпад оставено на јавна површина на улицата „Кољо Орцев“ во Струмица, по што против сторителот биле поведени прекршочни постапки.
ПРОДОЛЖЕНИЕ:
Вонредниот инспекциски надзор бил извршен на 30 јули 2026 година од страна на општински комунални инспектори и инспектор за улици и патишта, врз основа на наредба издадена од градоначалникот на Општина Струмица.
При контролата било утврдено дека отпадот потекнувал од реконструкција и преуредување станбена единица во колективен објект за домување. Градежниот шут бил оставен на тротоарот, со што било загрозено движењето на пешаците, а истовремено било попречено и безбедното одвивање на сообраќајот на улицата.
По утврдувањето на идентитетот на лицето кое го оставило отпадот, инспекторите побарале негово итно отстранување. Екипи на ЈПКД „Комуналец“ – Струмица, со помош на градежна машина, го подигнале, натовариле и го одложиле отпадот на локација предвидена за таа намена. Трошоците за интервенцијата ќе бидат на сметка на сторителот.
Инспекциските служби констатирале прекршување на општинската Одлука за комунален ред и на Законот за јавни патишта. Против сторителот биле поведени прекршочни постапки и биле издадени прекршочни платни налози за наплата на глоби.
Од Општина Струмица апелираат до граѓаните и правните субјекти навремено да го пријавуваат градежниот отпад во ЈПКД „Комуналец“ и да ги користат услугите на претпријатието за негово соодветно отстранување и депонирање. При планирањето градежни активности, сопствениците и изведувачите треба однапред да го предвидат и начинот на постапување со отпадот, во согласност со законските прописи.
