Шестмина од седумчлената македонска алпинистичка екипа успешно го искачија врвот на вулканот Сан Франциско (6.018 м н.в.), кој се издига над соленото езеро Laguna Verde во пустината Атакама во Чиле. Експедицијата претставува значаен спортски и алпинистички подвиг, имајќи ги предвид специфичните услови на една од најсувите и најнегостољубиви пустини во светот.

Искачувањето започнало од висина од околу 4.900 метри надморска височина, а за освојување на врвот им биле потребни околу седум часа интензивно искачување. Иако временските услови не биле најповолни, со пониски температури и силен ветар, тимот покажал упорност, дисциплина и одлична физичка подготвеност, што резултирало со успешен и безбеден искачувачки ден.

Меѓу шестмината алпинисти кои го освоиле врвот беа и струмичаните Благој Ѓузелов и Никола Матушко, членови на планинарскиот клуб „Ентузијаст“ од Струмица. Нивното учество и успех претставуваат голема гордост за струмичката планинарска заедница и потврда дека со сериозна подготовка и посветеност можат да се освојуваат и сериозни светски врвови.

Македонската екипа со овој подвиг не само што го промовира алпинизмот и планинарството, туку и уште еднаш покажува дека македонските планинари достојно ја претставуваат државата на височини над 6.000 метри, во едни од најпредизвикувачките природни услови на планетата.