Фондацијата „Елеуса“ денеска сподели убава вест, средствата за лекувањето на малата Нина се целосно донирани минатата недела. Веста пристигнала со емотивна порака од семејството на Нина: „Сакаме од срце да ви се заблагодариме!“ – благодарност која не е упатена само до фондацијата, туку кон сите хумани граѓани кои донираа и присуствуваа на „Концертот на добрината“.
Во рамките на хуманитарната акција, беа собрани 3.000 евра, кои веќе се уплатени на семејството. Фондацијата соопшти дека успехот на акцијата уште еднаш ја покажал големината и солидарноста на заедницата.
„Концертот на добрината за Нина ја покажа вашата човечност и добрина,“ велат од „Елеуса“, изразувајќи искрена благодарност за секоја донација и секој гест на поддршка.
Фондацијата „Елеуса“ и донаторите уште еднаш покажаа дека добрината навистина обединува, а малата Нина денес има повеќе надеж благодарение на заедничкото срце на хуманоста.
