Ученици од четврто одделение од Основното општинско училиште „Сандо Масев“ – Струмица, придружувани од своите наставници, денеска ја посетија Општина Струмица, каде се запознаа поблиску со работата на локалната самоуправа.
Гостите ги пречека градоначалникот на општина Струмица, Петар Јанков, кој на учениците им го претстави начинот на кој функционира Општината, надлежностите на локалната власт, како и дел од секојдневните обврски и активности на градоначалникот.
Основците покажаа големо интересирање за тоа како се носат одлуките важни за граѓаните, кои служби делуваат во рамки на општинската администрација, но и како може еден ден да се стане прв човек на општината. Градоначалникот Јанков со задоволство одговараше на нивните прашања и на разбирлив начин им ја доближи важноста на граѓанското учество и одговорноста што ја носи оваа функција.
Во рамки на посетата, учениците беа запознаени и со дел од плановите и идните проекти што Општина Струмица ги реализира и планира за подобрување на условите во нивното училиште, како и со активности насочени кон подобрување на квалитетот на живеење за младите во градот.
Од Општина Струмица истакнуваат дека ваквите посети се значајни за поттикнување на интересот на младите за локалната самоуправа и за нивно рано едуцирање за демократијата и институциите. Градоначалникот Јанков им се заблагодари на учениците за посетата, посакувајќи им да растат здрави, вредни и посветени на учењето, со верба дека токму меѓу нив се идните носители на одговорни функции во општеството.
