Во општина Струмица, започнува реализацијата на редовните вежби за евакуација на учениците и училишниот персонал во случај на пожар. Вежбите се организирани во соработка со директорите на основните и средните училишта, а во нив ќе учествува и Територијалната противпожарна единица (ТППЕ) Струмица.
Како што истакна градоначалникот на општина Струмица, Костадин Костадинов, целта на овие активности е да се зголеми безбедноста на учениците и наставниците, како и да се осигура брзо и ефективно реагирање во случаи на непредвидени настани.
“Апелирам до сите граѓани да не создаваат паника ако приметат невообичаени случувања или интервенции на терен, бидејќи станува збор за вежби и симулации”, објави Костадинов.
Тој додаде дека вежбите ќе се организираат еднаш неделно во различни училишта, што ќе помогне во постигнување на повисок степен на подготвеност и на училишниот персонал и на учениците.
Активностите се дел од редовните подготовки на општината за справување со ризици и непредвидени ситуации, со цел да се гарантира безбедноста и заштитата на најмладите.
