Фотографијата на струмичкиот фотограф Роберт Атанасовски се најде на страниците на британскиот весник „Гардијан“, во рамки на известувањето посветено на Струмичкиот карневал. Со ова, еден од најпрепознатливите културни настани во Македонија доби дополнително меѓународно внимание, а Струмица повторно се позиционираше како град на традиција, креативност и карневалска енергија.
Објавата во „Гардијан“ го пренесува духот на карневалските денови и ја нагласува уникатната атмосфера што секоја година ја создаваат маските, музиката и илјадниците посетители кои ја исполнуваат Струмица.
Фотографијата на Атанасовски, преку впечатлив кадар, го доловува токму тој момент, радоста, боите и препознатливиот карневалски идентитет на градот.
Ваквото медиумско присуство се смета за значајна промоција на Струмичкиот карневал и на Струмица воопшто, бидејќи вниманието на еден од најчитаните светски медиуми претставува потврда за вредноста на настанот и неговата автентичност. Воедно, ова е и признание за локалните автори и фотографи, чии дела стануваат дел од глобалната медиумска сцена.
