Денеска Струмица со големо достоинство и традиционална свеченост ги чествуваше своите заштитници – Светите петнаесет тивериополски свештеномаченици. Прославата започна со света литургија во храмот посветен на овие маченици, каде што бројни верници и граѓани се собраа за да им оддадат почит на светителите кои се дел од идентитетот и духовноста на градот.

Чествувањето продолжи со свечената седница на Советот на општина Струмица, која се одржа во големата сала на Домот на културата „Антон Панов“. На седницата беа доделени традиционалните награди на заслужни граѓани и институции, кои со својата работа оставиле значителен печат во развојот и културниот живот на градот.

Најемотивен момент на седницата беше доделувањето на наградата за животно дело, која оваа година му беше доделена (постхумно) на легендата на струмичката и македонската естрада – Гоце Арнаудов. Наградата ја прими неговото семејство, кое изрази благодарност за признанието и за споменот што останува жив меѓу неговите сограѓани.

Гоце Арнаудов, познат како „струмичкиот славеј“, остави непроценливо музичко наследство и беше амбасадор на македонската музика низ светот. Неговите песни и денес ги допираат срцата на многумина, претставувајќи ја убавината и богатството на македонската народна музика.