Кире Синдраковски е назначен за нов директор на ЈПКД „Комуналец“ – Струмица. Роден во 1978 година, тој е дипломиран машински инженер при Универзитетот „Св. Кирил и Методиј“ во Скопје. Сопруг и татко на две деца, зад себе има речиси две децении професионално искуство, претежно во приватниот сектор.
Својата кариера Синдраковски ја започнува како раководител во компаниите „Далвина“ и „Агролозар“, каде што стекнува значајни менаџерски и организациски вештини. Последните осум години успешно го развива сопствениот бизнис, што дополнително го зацврстува неговото искуство во управување со ресурси, тимови и процеси. Краток период бил ангажиран и во образованието, како наставник по предмети од машинската струка во ДСУ-РЦСОО „Никола Карев“ – Струмица.
Со комбинација од техничко знаење и практично менаџерско искуство, Синдраковски во јавноста е претставен како кадар кој треба да придонесе за модернизација и унапредување на работата на ЈПКД „Комуналец“ – Струмица, со фокус на ефикасни услуги за граѓаните и одговорно управување со јавното добро.
Во својата прва изјава за Струмица Денес по назначувањето, Кире Синдраковски ја истакна својата посветеност кон професионално и транспарентно работење:
„Честа и одговорноста да се биде директор на ЈПКД „Комуналец“ – Струмица се огромни. Речиси 20 години работно искуство, главно во приватниот сектор, ми помогнаа да стекнам дисциплина, системски пристап и јасно чувство за одговорност. Токму тоа знаење и техничка експертиза ќе ги вложам во секојдневното функционирање на претпријатието.
Мојата цел е да работиме посветено на подобрување на услугите, на резултатите и на целокупното корисничко искуство на граѓаните. Важно ми е да градиме силен тим, да воведуваме современи практики и да бидеме отворени за комуникација со јавноста. Верувам дека со заедничка работа, почит кон јавниот интерес и транспарентност можеме да постигнеме повисоко ниво на хигиена, уреденост и функционалност во нашиот град.“
Во следниот период, од Синдраковски се очекува да воспостави јасна динамика на работа, да го зајакне тимскиот дух во претпријатието и преку конкретни мерки да придонесе за почиста и поуредена Струмица.
ЈПКД „Комуналец“ – Струмица останува еден од клучните столбови за квалитетот на живот во градот, а именувањето на нов директор се гледа како можност за дополнително унапредување на услугите за граѓаните и поголема транспарентност во работењето.
