Општинскиот комитет на ВМРО-ДПМНЕ од Струмица излезе со реакција во врска со како што велат, „несполнетото ветување за изградба на социјална населба за турското население кај терминалот“, дадено од страна на СДСМ пред повеќе од една деценија.
Во писменото соопштение испратено до медиумите, ВМРО-ДПМНЕ потсетува дека во изборната програма за локалните избори во 2013 година, тогашниот советник од СДСМ, Коста Костадинов, најавил изградба на 100 социјални куќи наменети за оваа категорија граѓани. Сепак, од опозициската партија велат дека и покрај поминати 12 години, на терен сè уште не е поставен ниту темел за реализација на проектот.
„Иако беа планирани повеќе од 2 милиони евра од државниот буџет за овој проект, и покрај тоа што беа троштени средства и од општинскиот буџет, социјалната населба остана само на хартија“, се вели во соопштението.
Од ВМРО-ДПМНЕ истакнуваат дека низ годините, во периоди блиски до избори, градоначалникот Коста Костадинов и претседателот на Советот, Марјан Даскаловски, организирале посети на локацијата во присуство на повеќе функционери на СДСМ, меѓу кои поранешниот премиер Зоран Заев, Димитар Ковачевски и како што се наведува, последно и Венко Филипче.
Во реакцијата се додава дека „наместо реализација на ветувањето, јавноста добива само фотографии и медиумска промоција, без видливи резултати на терен“, при што се истакнува дека овој проект, според нив, е пример за, како што го нарекуваат, „децении стар трул систем во локалната самоуправа на Струмица“.
Засега, од Општина Струмица или од СДСМ не е пристигната реакција на обвинувањата.
