Струмичката компанија „ЛАВ КОМЕРЦ“ го доби признанието „Лидер во дејноста“ на настанот „Бизнис Лидер 2026“, во конкуренција од над 155 компании, соопштија од компанијата. Признанието го оценуваат како значајна потврда за долгогодишната работа, стабилниот развој и довербата што ја градат со вработените, клиентите и деловните партнери.

Според објавата на „ЛАВ КОМЕРЦ“, оценувањето се темели на објективни анализи и строго дефинирани критериуми, кои ги опфаќаат приходите, профитабилноста, растот, бројот на вработени и бонитетната стабилност. Од компанијата нагласуваат дека токму ваквиот пристап му дава посебна тежина на признанието, зад кое стојат мерливи деловни резултати.

За струмичката компанија, наградата претставува и потврда на определбата за стабилен раст, вложување во луѓето и одговорно исполнување на обврските кон партнерите. Градењето компанија на која може да ѝ се верува, посочуваат оттаму, останува меѓу нивните главни приоритети.

Посебна благодарност упатуваат до вработените, чија посветеност, знаење и труд ги издвојуваат како основа на секој постигнат успех. Благодарност изразуваат и до клиентите и деловните партнери за долгогодишната доверба и соработката.

Од „ЛАВ КОМЕРЦ“ порачуваат дека признанието е дополнителен поттик за натамошен развој. Компанијата продолжува со истите вредности и со цел да ги подобрува резултатите и да ја оправдува довербата на сите што се дел од нејзината деловна приказна.