Со приближувањето на зимата, Министерството за внатрешни работи потсетува дека од 15 ноември до 15 март сите возила што се движат по јавните патишта мора задолжително да поседуваат зимска опрема. Правилото важи за сите категории возила, без разлика на тоа дали се користат во урбани средини или на отворени патишта.
Од МВР нагласуваат дека оваа обврска не е само законска, туку и мерка за безбедност и превенција во услови на снег, мраз и ниски температури.
„Со почетокот на зимскиот период, апелираме до возачите навреме да ги подготват своите возила. Зимската опрема спасува животи и спречува сообраќајни застои и несреќи,“ стои во соопштението.
Според правилникот, зимска опрема подразбира зимски пневматици со минимална длабочина на шарата од 4 милиметри за автомобилите до 3.500 килограми, а 6 милиметри за потешките возила и оние со погон на сите четири тркала. Дозволено е користење и на летни пневматици, но само ако возилото во приборот има синџири за снег со соодветна големина.
Автобусите и товарните возила што не можат технички да постават синџири мора да имаат зимски гуми и прирачен алат – лопата.
Како зимски гуми се признаваат оние што носат ознаки „M+S“, „MS“ или „M&S“, како и симболот снегулка на планина со три врва. Во исто време, останува забраната за користење пневматици со клинци.
Со овие мерки, МВР има цел да обезбеди попрoтечно и побезбедно одвивање на сообраќајот во зимски услови и да ја намали можноста за несреќи и блокади на патиштата.
Властите апелираат граѓаните да не го оставаат првиот снег како потсетник – зимата доаѓа, а подготвеноста започнува сега.
