Во Општина Струмица денес се одржа значаен работен состанок на кој присуствуваа градоначалниците на четирите општини од Струмичката котлина – Петар Јанков (Струмица), Славе Андонов (Василево), Ристо Манчев (Босилово) и Ѓорѓе Божинов (Ново Село). Средбата претставува историски чекор кон создавање заедничка визија за развој на целиот регион како единствена целина.
На иницијатива на градоначалникот на Општина Струмица, Петар Јанков, локалните лидери разговараа за продлабочување на меѓуопштинската соработка во повеќе области со цел поефикасен и рамномерен развој на регионот.
Меѓу темите што беа опфатени на состанокот се:
Решавање на проблемот со дивите депонии во регионот;
Воспоставување заеднички систем на јавен превоз во целата котлина;
Развивање на регионална туристичка понуда за побрз економски раст;
Поттикнување на координирана меѓуопштинска соработка во повеќе сектори.
Со оваа иницијатива се создава основа за заедничко планирање и реализација на проекти што ќе придонесат за подобар квалитет на живот и одржлив развој на целиот струмички регион.
