Владата предложи измени во Законот за безбедност на сообраќајот на патиштата, со кои се воведуваат ригорозни правила и за пешаците, велосипедистите и возачите на електрични тротинети. Пешаците ќе бидат должни да преминуваат улица внимателно, без користење електронски уреди како слушалки во двете уши, мобилен телефон, таблет или смарт часовник.

Ако полицијата ги фати, глобата за пешаците ќе изнесува 40 евра во денарска противвредност. За велосипедистите, кои исто така не смеат да користат слушалки или мобилен додека возат, глобата е 50 евра. Истите правила важат и за возачите на мопеди, мотоцикли, трицикли и електрични тротинети.

Овие измени се дел од проектот „Безбеден град“, кој прво ќе се воведе во Скопје, Тетово и Куманово, а до средина на 2026 година ќе биде имплементиран низ целата држава, со цел поголема безбедност на улиците и превенција на сообраќајни незгоди.