Од вчера, па сè до 20 август, Општинската организација на Движење ЗНАМ – Струмица започнува теренско анкетирање на граѓаните, во рамки на кампањата под мотото „Со срце за општината“. Целта на оваа активност е преку директен контакт со струмичани да се изгради програма за претстојните локални избори, базирана врз реалните потреби, проблеми и предлози на граѓаните.
Од организацијата истакнуваат дека не веруваат во програми пишувани зад затворени врати, туку во отворен процес во којшто гласот на народот е најважен. Програмата, велат, ќе ја пишуваат самите граѓани – со нивните маки, нивните потреби и нивните визии за подобра Струмица.
Граѓаните се повикани да го посетат информативниот пулт на Движење ЗНАМ, каде што можат да пополнат анкетен лист или директно да споделат што ги мачи, што сакаат да се промени, и какви претставници сакаат во Советот на Општина Струмица.
„Нашата врата е отворена за сите чесни, вредни и уште мотивирани граѓани. Ако имате знаење, вредности и срце за Струмица – приклучете се! Време е за промени, време е струмичани да го земат градот назад во свои раце“, порачуваат од Движењето.
