Речиси комплетен скелет од диносаурус ќе се најде на аукција во Париз следниот месец. Камптосаурусот стар 150 милиони години бил откриен во 90-тите во американската држава Вајоминг.
Името Бери го добил по Бери Џејмс, палеонтологот кој го пронашол. Експертите велат дека скелетот е „исклучително добро сочуван“. Се очекува да достигне цена од 1,2 милиони евра на аукцијата која ќе се одржи во аукциската куќа „Drouot Paris“ на 20 октомври.
Бери датира од периодот на доцниот Јура и е висок 2,1 метри и долг 5 метри.
Александр Жикело од аукциската куќа Drouot Paris рече дека е невообичаено да се види таков недопрен скелет на диносаурус.
„Черепот е 90% цел, а остатокот од диносаурусот е 80% цел“, рече Жикело.
Продажбата на фосили од диносауруси е ретка, а мал број фосили од диносауруси се продаваат ширум светот секоја година, иако некои експерти изразија загриженост за примероците кои завршуваат во приватни раце.
Во април, тираносаурус рекс беше ставен на аукција за прв пат во Европа.
Зборувајќи за BBC во тоа време, професорот Стив Брусат, експерт за диносауруси на Универзитетот во Единбург, рече дека е загрижен дека скелетите, кои се „научно многу вредни“, би можеле „да исчезнат во трезорите на приватните колекционери“.
