Струмица има млади со кои може гордо да се пофали. Прогресивно се зголемува бројот на организирани промоции на книжевни и ликовни дела на нивото на градот и општината. Овојпат, струмичани ќе имаат можност да уживаат во нешто поразлично – изложба на модни креации, подготвени од вештите раце на 19 годишната Данче Лазарова.
Љубовта кон естетиката и креативниот ум се основата за работа како моден дизајнер, а Данче тоа добро го знае. Веќе може да се пофали со голем број задоволни клиенти од различни краишта на државата, иако ова е само почетокот на нејзината кариера. Доминантни модни парчиња во нејзината работа се фустаните, кои ја отсликуваат и вознесуваат женската силуета и придаваат самоувереност.
За нашата редакција, Данче го објаснува мотивот на изложбата: „Доволно долго работам и имам задоволни клиенти. Сакав во оваа прилика на своите сограѓани да им се претставам во полно светло, што работам, со каква пасија се предавам на изработката на креациите и истовремено уште еднаш да им ставам до знаење на моите врсници дека занаетот е злато и се вреднува и во денешно време.“
Тематиката на изложбата ќе биде поврзана со морските ѕвезди, нивната уникатност, разноликост, убавина, нивната асоциација со летото, со морето и со пенливите бранови. Изложбата ќе се одржи на 30 јули, со почеток од 19:00 часот во просториите на Домот на културата во Струмица. Поканет е секој љубител на модата и на уметноста.
