Вработените во компаниите на познатиот струмички бизнисмен Ристо Крмзов следниот понеделник планираат да одржат протест пред Регионалната дирекција на Управата за јавни приходи (УЈП) во Струмица. Според нивните тврдења, неправилностите и прекумерната злоупотреба на овластувањата од страна на раководните структури на УЈП довеле до блокирање на сметките на пет фирми во сопственост на Крмзов, поради што околу 500 вработени не можат да добијат плата. На протестот ќе учествуваат вработените од Крмзов МР, Агро-Крмз, Џокс Премиум, Хотел Вила Парк и Никфан Транс, објави ТВ Телма.
Пред еден месец, Управата за јавни приходи, во соработка со Обвинителството за гонење организиран криминал и корупција и полицијата, спроведе претрес во домовите и фирмите на Крмзови. Оваа акција се одвиваше во рамки на предистражна постапка поврзана со сомнежи за даночно затајување, даночна измама и перење пари.