Со цел трајно решавање на долгогодишниот проблем со дивата населба на улицата „Климент Охридски“, Општина Струмица се наоѓа во напредна фаза со реализација на проектот за изградба на нова социјална населба. Проектот предвидува дислокација на жителите кои сега живеат во објекти изградени без дозвола, на локација која, според надлежните, не е безбедна за живеење.

Во рамки на првата фаза, целосно се завршени градежни активности во вредност од 100 милиони денари. Поставени се потпорни ѕидови, изградена е пристапна улица, како и улично осветлување и канализација. Втората фаза опфати поставување на водоводна мрежа и нов резервоар кој не само што ќе ја снабдува новата населба, туку ќе го ублажи и проблемот со водоснабдување во горниот дел од градот кој се јавуваше во летните месеци.

Од Општина Струмица информираат дека започнува првиот дел од третата фаза. Изработени се проекти за 26 од вкупно 118 предвидени куќи. Општината веќе аплицирала на повик од Владата за обезбедување финансиска поддршка за понатамошна реализација.