И покрај почетокот на примената на роковите за дислоцирање на казината, салите со слот-апарати и обложувалниците, интересот за игрите на среќа не покажува знаци на намалување.

Податоците од Управата за јавни приходи (УЈП) покажуваат дека во првата половина од годинава граѓаните на Македонија и странските државјани потрошиле вкупно речиси 1,6 милијарди евра на игри на среќа.

Најголем дел од сумата бил потрошен преку електронските апарати за игри на среќа, додека казината и обложувалниците и натаму заземаат значаен дел од пазарот.

Овие бројки покажуваат дека секторот за игри на среќа и понатаму има огромен финансиски обем и покрај новите мерки со кои се ограничува близината на објектите за игри на среќа до училиштата и другите образовни институции.

Приредувачите на игри на среќа, пак, се противат на дислоцирањето на објектите. Тие сметаат дека мерката нема да го елиминира коцкањето, туку може да доведе до зголемување на нелегалните активности поврзани со игрите на среќа.

Според нив, отстранувањето на казината, салите со слот-апарати и обложувалниците од непосредната близина на образовните институции нема да го намали коцкањето, туку дел од активностите би можеле да се пренасочат кон канали надвор од државната контрола и надзор.