Градоначалникот Коста Јаневски, попладнето ги поздрави учесниците во настаните на Олимпискиот ден во Струмица во спортската сала на СОУ ,,Никола Карев”, а кој што се одржа во организација на Македонскиот олимписки комитет, Општинскиот сојуз на училишен спорт – Струмица и Општина Струмица.
-Колку е важен спортот за младите и не е потребно посебно да се истакнува. Тоа се подразбира само по себе, особено денес кога младите се исправени пред опасностите кои ги демнат, а тоа се пороците на 21. век. Спортскиот живот е најдобриот противник на тие пороци, и како таков секогаш на крајот излегува како победник. Затоа вреди секогаш да се потсетуваме на изреката – „Во здраво тело, здрав дух“, бидејќи таа гарантира правилен развој и живот по мерка на секој поединец.
Од друга страна треба да знаеме дека „олимпизмот“ е и нешто повеќе од спорт. Тој значи и пријателство, разбирање, толеранција и почитување, нешта кои треба да одат рака под рака со спортот. Во таа насока е и олимпиското движење во целиот свет, па така треба да биде и кај нас. Затоа драги ученици – млади спортисти, спортувајте, натпреварувајте се, но секогаш почитувајте ги и другите, затоа што тие не ви се противници, туку пријатели. И за крај, имајте ја на ум пораката на „таткото на олимпизмот“ Пјер Де Кубертен: „Не е важно да се победува, туку да се учествува, рече градоначалникот Јаневски.
