Во 1977 година, археолозите направија сензационално откритие кај античкиот град Кутлеш, каде што веруваа дека ги пронашле гробниците на семејството на Александар Велики.
Истражувањата укажуваа дека во трите гробници, наречени Гробници I, II и III, се наоѓаат останките од неговиот татко Филип II, синот Александар IV и полубратот Филип III. Но, нова студија го доведува во прашање ова долго прифатено толкување.
Научниците тврдат дека останките не му припаѓаат на Филип II, туку на друг член на династијата Аргеади
Истражувачкиот тим предводен од д-р Јанис Маниатис од Националниот центар за научни истражувања во Грција, утврдил дека скелетот во Гробница I не може да му припаѓа на Филип II. Според радиојаглеродно датирање и анализа на коските, мажот бил стар меѓу 25 и 35 години и умрел некаде меѓу 388 и 356 година п.н.е., додека Филип II бил убиен во 336 година п.н.е. на возраст од околу 45 години. Со тоа, научниците категорично исклучуваат дека се работи за таткото на Александар Македонски.
Дополнително, откриено е дека во истата гробница биле погребани остатоци од најмалку шест различни доенчиња, сите датирани од римскиот период помеѓу 150 и 130 година п.н.е.
Ова укажува дека подоцна, по уништување или природен настан кој ја отворил гробницата, Римјани можеби ги закопувале своите мртви деца во веќе постоечката гробница.
Радиојаглеродното датирање и ДНК анализите откриваат нови детали за најпознатата македонска гробница
Студијата ги оспорува и наводите на проф. Антониос Барциокас, кој минатата година тврдеше дека токму во Гробница I се наоѓаат остатоците на Филип II, неговата сопруга Клеопатра и нивното новороденче. Но, според д-р Маниатис и неговиот тим, ваквите тврдења немаат научна основа. Истражувачите сега сметаат дека мажот во Гробница I бил повозрасен член на кралското семејство на Аргеадите – династијата на Александар Велики.
Со анализа на хемиските изотопи од забите, се утврдува дека овој маж најверојатно не пораснал во регионот на Кутлеш, туку потекнувал од северозападна Грција или Пелопонез.
Иако се исклучува можноста да е Филип II, истражувачите се сигурни дека се работи за значајна кралска личност, блиска до семејството на Александар Велики.
