Најновото истражување на платформата Numbeo, објавено од порталот RankingRoyals, дава преглед на просечната месечна нето заработка за 2024 година во 50 земји во светот. Ова се сумите што ги добиваат вработените по одбивањето на данокот.
Според резултатите, најголема заработка е забележана во Швајцарија, каде просечната нето плата е 6.558 долари месечно. Следуваат Луксембург со 5.706 долари и Соединетите Американски Држави со 4.353 долари. На врвот на листата се Исланд (3.919 долари), Катар (3.795 долари), Сингапур (3.711), Хонг Конг (3.630), Данска (3.562), Австралија (3.441) и Холандија (3.367).
Од друга страна, меѓу 50-те најразвиени земји, најниски просечни нето плати се забележани во Полска (1.463 долари), Чешка (1.501), Естонија (1.531), Малта (1.542) и Словенија (1.543 долари).
Истражувањето покажа и одредени несогласувања меѓу економската сила на земјите и заработката на граѓаните. Така, некои членки на Г7 како Јапонија (2.114 долари), Италија (1.672 долари) и Шпанија (1.776 долари) се на долната половина на листата.
Списокот вклучува и бројни азиски и блискоисточни економии. Обединетите Арапски Емирати забележале просечна нето плата од 3.099 долари, Кувајт 3.044 долари, а Израел 2.946 долари. Јужна Кореја и Тајван постигнуваат малку поскромни резултати – 2.240, односно 1.598 долари.
Во европски рамки, Македонија е меѓу земјите со најниски просечни плати. Според извештајот на CEOWORLD за 2024 година, земјата се наоѓа на 82-ро место во светот со просечна месечна плата од 658 долари, надминувајќи само неколку други европски земји како Белорусија, Украина, Молдавија и Косово.
Овие податоци откриваат големи разлики во животниот стандард ширум светот и служат како обележје за разбирање на глобалната економска нерамнотежа и потребата од реформи кои би ја зголемиле куповната моќ на граѓаните.
