Апелациониот суд во Штип ја прифати жалбата на ОЈО Струмица за укинувањето на мерката притвор за градоначалникот на Ново Село Боро Стојчев и останатите осудени заради обид за пренесување непријавена стока и им изрече мерка притвор до правосилноста на пресудата.

Имено, на 25-ти овој месец Основниот суд во Струмица го осуди актуелниот градоначалник на Ново Село на казна затвор во траење од 18 месеци, а неговиот син и внук добија казни од по 12 месеци. Сопругата на градоначалникот доби условна казна од една година поради здравствени причини, а лицето кое требало да го набљудува теренот од полицијата е осудено на 10 месеци затвор.

По изрекувањето на пресудата судијата во Основниот суд во Струмица им ја укина мерката притвор, а по жалбата од ОЈО-Струмица сега Апелација одлучи на Стојчев и останатите да им изрече мерка притвор до правосилноста на пресудата, односно до 60 денови.

На 25-ти овој месец Основниот суд во Струмица им изрече затворски казни на градоначалникот на Ново Село и останатите, бидејќи полицијата ги фати кај месноста Попова Чука како пренесуваат цигари.

Засега нема информации дали одбраната и обвинителството поднеле жалби на висината на изречените казни.