Градоначалникот на Општина Струмица, Петар Јанков, информираше дека во тек е реконструкција на мултифункционалното игралиште во рамките на Средното општинско училиште „Јане Сандански“.

Според најавите на Јанков, новиот простор ќе располага со терени за фудбал и кошарка, кои ќе бидат обложени со современа полипропиленска подлога. Овој спортски комплекс примарно е наменет за потребите на учениците од училиштето, но ќе биде отворен и за локалните спортски клубови, како и за рекреација на сите граѓани на Општина Струмица.

Проектот се реализира со финансиски средства обезбедени од Министерството за спорт, а со поддршка од Општина Струмица. Градоначалникот Јанков упати јавна благодарност до Министерството за реализацијата на овој проект кој значително ќе ја подобри спортската инфраструктура во градот.