Возот од Мадрид до Казабланка, преку новиот тунел под Гибралтар, би се движел пет и пол часа
Светското првенство во 2030 година заеднички го организираат Мароко, Шпанија и Португалија, а таа година е реалниот рок за изградба на тунелот што ќе ги поврзува Европа и Африка.
Идејата за изградба на тунел меѓу Шпанија и Мароко првпат се појави во 1979 година, а деновиве повторно оживеа. За изградба на тунел под морето интензивно се разговара во двете соседни земји кои ги дели Гибралтарскиот теснец.
Во моментов, летот меѓу шпанската метропола Мадрид и мароканскиот град Тангер трае околу час и половина, а ако го тргнете истиот пат со автомобил, ќе ви требаат околу девет часа, а сето тоа со траект.
Новиот тунел би ја отворил можноста за директна железничка врска од Мадрид до Казабланка, а патувањето би траело околу пет и пол часа. Возот би поминувал под Гибралтар и би водел директно до Тангер, а оттаму до другите марокански градови.
Шпанските и мароканските власти пред неколку години започнаа анализа на старите планови од 1979 година и истражување на областа Гибралтарскиот Теснец за да утврдат дали проектот е остварлив и одржлив во денешните околности.
Одржани се повеќе состаноци на кои била изразена намерата за спроведување на планот, а како пожелен рок било посочено тоа да биде „што е можно поскоро“, според Еуроњуз.
Не се знае многу за деталите од планот за изградба на тунел. Доколку се оствари планот, тунелот ќе биде долг 27,5 километри.
Сè уште не се познати и трошоците за изградба, но сосема е извесно дека се зборува за сума од над една милијарда евра.
Шпанците досега само за истражување потрошиле 2,3 милиони евра. Трасата на тунелот би се протегала од Пунта Палома во Тарифа до Пунта Малабат во заливот Тангер.
Би бил ископан на длабочина од 300 метри и би имал максимален наклон од три проценти. Ќе бидат потребни околу пет години за да се изгради – доволно за тунелот да биде готов до фудбалското првенство.
