Секторот за внатрешни работи Струмица преку Отсекот за превенција, а во партнерство со Дирекцијата за заштита и спасување ПО- Струмица, во летниот период интензивно презема активности во рамките на кампањата „Лето без пожари“.

Целта на кампањата е заштита и зачувување на зелените шумски површини, земјоделското земјиште, ливадите и пасиштата од пожари, преку подигање на свеста на граѓаните за ризиците од појава на пожари и штетите од истите.

Од страна на полициските службеници од Отсекот за превенција и инспектор за пожари од ДЗС на непосредни средби на граѓаните им се делат летоци со основни безбедносни совети и како да се постапи при откривање шумски пожар.

Истовремено се апелира до граѓаните на зголемена будност и внимателност од предизвикување пожари во претстојниот период, внимателност при движење на отворени простори заради превенција од пожари, предизвикување на општа опасност и загрозување на животот, здравјето и имотот на граѓаните, да не се фрлат догорчиња и отпушоци на отворен простор, да не се пали оган на отворено, стрништа, плевел и отпадоци со што заедно ќе придонесеме за зачувување на шумите и истите да ги оставиме во наследство на идните генерации.

СВР Струмица потсетува дека предизвикувањето на шумски пожар намерно или од невнимание претставува кривично дело, кое се санкционира со соодветни поднесоци и за кое е предвидена и затворска казна до 8 години (член 227 од Кривичниот законик), зависно од видот на пожарот и другите околности и последици.