Македонскиот репрезентативец Васе Михаилов го официјализираше својот трансфер од редовите на двократниот бранител на титулата Џио Струмица во скопски Вардар, а неговото заминување нашиот одбојкарски шампион го одбележа со стил.

Струмица покажа дека е голема и дека знае да ги цени своите одбојкари, а преку својот официјален Фејсбук профил, му се заблагодари на Михаилов за се што сторил за клубот и го именуваше како „капитен каков што секој клуб може да посака“.

„Нашиот капитен од денеска веќе не е член на нашиот тим. Од следната сезона ќе го носи дресот на нашиот најголем ривал Вардар од Скопје.

Му благодариме за сите убави моменти и радости кои ни ги донесе во минатата деценија, за пет од седумте двојни круни, за многуте медаљи, награди и признанија. Беше најголемото лице на нашиот клуб. Беше лидер, водич и капитен и во најдобрите и најтешките моменти. Капитен како што секој клуб може да посака. Му посакуваме среќа и успех во новата средина“, напиша Џио Струмица на официјалниот профил.

Михаилов целата своја кариера ја има минато во Џио Струмица, со исклучок на една полусезона во Вардар и една полусезона во албанското првенство. Тој со Вардар потпиша договор на две години.

ИЗВОР:СПОРТМЕДИА