Се чини дека гумите за џвакање придонесуваат за внесување микропластика во организмот.
Како што се наведува во пилот-истражување кое чека рецензија, истражувачи од Универзитетот во Калифорнија откриле дека гумите за џвакање ослободуваат илјадници микропластични делчиња во вашата плунка.
Резултатите се уште еден пример за широко распространето загадување со микропластика, кое е толку присутно што навлегло во човечкиот мозок. Но, авторите советуваат да не паничиме за нашата навика на консумирање гуми за џвакање.
– Нашата цел не е да алармираме. Научниците не знаат дали микропластиката е опасна за нас или не. Немаме човечки испитувања. Но, знаеме дека сме изложени на пластика во секојдневниот живот, и тоа беше она што сакаме да го испитаме овде – вели Санџај Моханти, главниот автор на истражувањето.
Обично се грижиме дека микропластиката може да навлезе во нашата храна. Но, со гумата за џвакање таа буквално е наша храна. Брендови произведени од компании како „Вригли“ се направени од различни синтетички гуми, вклучувајќи ги материјалите користени во автомобилските гуми. Сепак, иако се делумно производ од нафта, потенцијалот на гумата за џвакање да шири микропластика не е широко испитуван, според авторите на најновото пилот-истражување.
За да ја пополнат оваа празнина, Моханти и неговиот колега анализирале примероци на плунка од еден субјект кој џвакал гума четири минути. Тестирале десет бренда – пет синтетички и пет природни гуми за џвакање.
– Изненадувачки, и синтетичките и природните гуми ослободувале слични количини на микропластика кога ги џвакавме – изјави коавторот Лиса Лоу, истражувач на Универзитетот во Калифорнија.
Што значи тоа во бројки? Просечно, џвакањето една гума за џвакање која може да тежи помеѓу еден и шест грама ослободува до 600 микропластични делчиња по грам, откриваат истражувачите. Ако некој џвака 180 парчиња годишно, може да консумира околу 30.000 делчиња микропластика.
Тоа е значителна количина, но Моханти нагласува дека тоа не е толку многу во споредба со друга храна. На пример, литар вода пакувана во шише содржи просечно 240.000 делчиња микропластика.
Дали треба да бидеме загрижени?
– Не мислам дека треба да престанете со џвакање гуми. Повеќето од микропластиките, ако се проголтаат, веројатно ќе поминат директно низ вас без никакво влијание – вели Оливер Џонс, професор по хемија на Универзитетот РМИТ во Австралија, кој не бил вклучен во истражувањето.
Со оглед на тоа што научниците се на почетокот на составување на деловите на штетата од микропластика, здравствените импликации остануваат нејасни. Од друга страна, постојат сѐ поголем број докази кои ја поврзуваат микропластиката со многубројни штетни ефекти врз човечкото тело, особено кога честичките ќе влезат во крвотокот, вклучувајќи зголемен ризик од срцев удар. Поранешните истражувања покажале дека честичките можат да предизвикаат згрутчување на крвта во крвните садови на мозокот.
