Александар Вучиќ ги повика Приштина и западните сили да избегнат конфликт, но вети дека ќе употреби сила доколку Србите бидат прогонувани.
Српскиот претседател Александар Вучиќ упати молба за мир на Косово поради зголемените тензии со Приштина. Сепак, тој, исто така, вети дека „ќе се бори до смрт“ доколку етничките Срби на Косово бидат цел на нов погром.
„Атмосферата е вжештена и Србите нема да трпат повеќе злосторства“, рече Вучиќ во неделата во Белград. „Мојата молба до сите е да се обидеме да го зачуваме мирот речиси по секоја цена. Ги молам Албанците да се вразумат, Србите да не наседнуваат на провокации, но ги молам и претставниците на моќните и големи земји, кои ја признаа таканаречената независност на Косово, малку да внимаваат на меѓународните законот и реалноста на теренот и да не дозволат нивните штитеници да предизвикуваат конфликти“.
Приштина се подготвува да го спроведе законот со кој се бара од етничките Срби што живеат на спорната територија да ги заменат своите регистрации на возила од Србија со косовски таблички, почнувајќи од понеделник. Косово, исто така, може да бара замена на други видови документи издадени од Србија, како што се личните карти, и повторно ќе се обиде да го забрани влезот или да им издаде привремени документи на патниците со документи или регистарски таблички издадени од Србија.
Во северниот дел на Косово во неделата ечеа црковните ѕвона, поради извештаите дека вооружени етнички Албанци се собираат за уште еден погром на преостанатите Срби – како што се случи во 2004 година.
Српскиот претседател минатиот месец тврдеше дека политиката на регистрација била дел од напорите да се принудат преостанатите Срби да излезат од Косово. Тој го нарече потегот „нова Олуја“, алудирајќи на хрватската воена операција во 1995 година, која ги принуди повеќето Срби да избегаат од Хрватска.
Српскиот министер за надворешни работи, Никола Селаковиќ, им изјави на новинарите во саботата дека „албанската страна на Косово и Метохија буквално се подготвува да направи пекол за Србите“.
Косовскиот премиер Албин Курти, етнички Албанец, рече дека транзицијата кон несрпски документи е само примена на „правото и правдата“ подеднакво за сите граѓани.
„Имајте доверба во вашата влада“, рече тој во видеопораката на српски јазик.
Вучиќ тврди дека „провокациите“ против Србите што живеат на Косово се зголемени откако Курти, националист што ја застапува идејата за обединување на Албанците, стана премиер минатата година. Бројот на ваквите инциденти, вклучително и нападите на етничките Албанци на српските гробишта и православните цркви, се зголеми за 50%, изјави тој за новинарите во неделата.
„Ние не сакаме конфликти и не сакаме војна“, рече Вучиќ во својот говор. „Ќе се молиме за мир и ќе бараме мир, но веднаш да ви кажам: нема да има предавање, а Србија ќе победи. Ако се осмелат да почнат да ги прогонуваат, малтретираат и убиваат Србите, Србија ќе победи“.
Вучиќ, исто така, шпекулираше дека Приштина се обидува да ја искористи украинската криза со тоа што ќе предизвика конфликт во кој Курти со симпатии ќе биде прикажан како косовска верзија на украинскиот претседател Владимир Зеленски, а Србите се во улога на Русија и претседателот Владимир Путин.
