Училишниот двор во населеното место Ангелци, кој долги години беше запуштен и без соодветна инфраструктура, наскоро ќе добие целосно нов лик. Општина Василево, со поддршка од Министерството за транспорт и врски, обезбеди средства за негово оградување и партерно уредување.

Според најавите од општината, по завршувањето на постапката за избор на изведувач, ќе започне реализацијата на проектот, кој предвидува изградба на современо детско игралиште, поставување на рекреативна опрема, оформување нови зелени површини, урбана опрема (клупи и корпи за отпадоци), изградба на ограден ѕид и поставување метална ограда, како и изградба на пристапни патеки.

„Децата се иднината на секое општество. Тие заслужуваат безбедни и инспиративни простори за игра и развој,“ порача градоначалникот Славе Андонов.

Со оваа инвестиција, училишниот двор во Ангелци ќе стане безбедно и функционално место за учениците, но и за сите деца од населеното место.