Премиерот Христијан Мицкоски изјави дека Владата планира мерки за ограничување на брзите кредити, особено по донесувањето на новиот Предлог-закон за игрите на среќа и забавните игри. Според анализите на Владата, долговите се една од главните причини поради кои многу граѓани ја напуштаат државата.

„Имајќи ги предвид сите аспекти на оваа индустрија, Владата настојува да спроведе одредени стандарди и политики. Нашите градови, задивени од рекламите и светлењето на билбордите, создаваат впечаток дека коцкарниците се основна индустрија. Оваа перцепција мора да се смени“, нагласи Мицкоски.

Тој укажа дека канцеларии за брзи кредити често се отвораат веднаш до казината и обложувалниците. „Правилото е дека до овие казина се отвораат и канцеларии за брзи кредити. Тоа е следниот предизвик на кој ќе работиме“, рече премиерот.

На прашањето дали Владата размислува за конкретни ограничувања за компаниите кои нудат брзи кредити, Мицкоски потврди дека решенијата се во процес на изработка, но не даде дополнителни детали. „Работиме на мерки за нивно ограничување, но нема да навлегувам во детали“, истакна тој.

Прочитајте и: Ненад Шапоња и Никола Јованоски, првите лауреати на наградата „Столб на речта“
Според него, анализите покажуваат дека задолжувањето е значаен социјален проблем. „Многу луѓе, при напуштањето на државата, наведуваат дека им се наталожиле долгови. Овој закон ќе помогне да се подобри состојбата во општеството“, додаде премиерот.

Владата претходно соопшти дека го усвои новиот текст на Предлог-законот за игрите на среќа и забавните игри, кој вклучува строги мерки за рекламирање на коцкањето и забрана за казина и обложувалници да бидат лоцирани на помалку од 500 метри од училишта. Досега, затворени се и 358 нелегални странски онлајн платформи за игри на среќа.