После речиси дваесет години пауза, на струмичката културна сцена повторно се враќа комедијата на струмички дијалект, овојпат како авторско дело на роднокрајниот писател Ацо Ѓоргиев.

Неговата нова комедија изобилува со сатирично-хумористични сцени, во кои преку духовит пристап се отвораат препознатливи теми од секојдневието, но и со моменти на суптилна еротика, вметнати со мерка и во функција на драмското дејствие.

Приказната е сместена во Струмица во седумдесеттите години на XX век, период кој носи посебен дух, атмосфера и локална боја. Преку јазикот, карактерите и сценските ситуации, делото нуди носталгичен, но и критички поглед на тогашните општествени навики и релации, задржувајќи ја препознатливата струмичка шега и менталитет.

Со оваа комедија, авторот најавува свежо оживување на жанрот што долго време недостасуваше во локалната театарска понуда, со акцент на автентичниот струмички говор и специфичната хумористична традиција на градот.