bandr
Струмица

СЕ ОДРЖА МАТУРСКИОТ БАЛ ВО СТРУМИЦА-ЧЕСТИТКИ ДО СИТЕ МАТУРАНТИ!

На плоштадот „Гоце Делчев“, денеска, точно напладне, се одржа матурскиот бал на кој што учествуваа матурантите од средните општински училишта. На оваа традиционална прекрасна манифестација присуствуваше и градоначалникот Коста Јаневски, кој на матурантите им посака успешно понатамошно чекорење во животот.

-Овој петок, овој 17. мај е ваш ден, ден кој вечно ќе го носите во вашите најубави животни спомени. Овој матурски бал не е привилегија на сите матуранти од земјава и Европа, туку само на тие кои се дел од градовите – учесници на оваа прекрасна традиционална манифестација. За среќа, Струмица безмалку цела една деценија пулсира со мајскиот ритам на музиката од Јохан Штраус, која е создадена за танцување. Танцувајте и Вие со вашите врсници од неколку градови од нашата татковина и од немал број европски земји и бидете горди што сте дел од оваа преубава несекојдневна приказна. Нека ве понесе „магијата“ на овој за вас свечен чин и нека на најубав можен начин биде одбележан вашиот „испит на зрелоста“. Но тој испит денес го полага и самата манифестација, која има отприлика исто толку години како и вие. Имено првата „матурска парада“ се случила во Љубљана во 2001 година, што значи дека денес таа полни 18 години и го слави своето полнолетство. Тоа дополнително треба да ве прави среќни и задоволни. Ви посакувам успешното понатамошно чекорење по патиштата на животот да започне токму денеска со лесен танцов чекор. Нека биде квадрил. Нека биде убав и незаборавен вашиот матурски бал, рече градоначалникот Јаневски.