Квизот на знаење беше последната во низата активности што СОУУД „Димитар Влахов“ – Струмица ги реализираше во рамките на одбележувањето на Месецот на науката – Ноември. Преку оваа завршна манифестација, училиштето уште еднаш ја потврди посветеноста кон поттикнување на љубопитноста, креативноста и истражувачкиот дух кај учениците.
Салата беше исполнета до последно место, а атмосферата, динамична и полна со позитивна енергија. Прашањата од различни научни области предизвикуваа насмевки, смеење и пријателски натпревар меѓу учесниците, претворајќи го квизот во вистинска научна авантура. Учениците покажаа завидно знаење, брза мисла и тимски дух, а публиката активно ги бодреше своите фаворити.
По неколку интересни и неизвесни рунди, беа прогласени и најуспешните тимови и поединци, кои заслужено ги понесоа титулите победници. Ним им беа упатени искрени честитки за вложениот труд и постигнатиот успех.
Организаторите истакнаа дека вистинската победа е желбата за учење и учество, па затоа упатија порака до сите останати ученици да не се откажуваат, веќе наредната година некој од нив може да биде на врвот.
Со овој квиз, СОУУД „Димитар Влахов“ – Струмица го заокружи Месецот на науката на забавен, мотивирачки и инспирирачки начин, оставајќи им на учениците многу нови идеи и поттик за идни научни предизвици.
