Веќе 4,6 милијарди години Јупитер е тивок чувар на Земјата. Додека спиеме, работиме и сонуваме, оваа џиновска планета стражари, привлекувајќи астероиди и комети кои би можеле да го уништат животот во еден миг.
Во 1994 година тоа го видовме со свои очи. Во текот на шест дена, 21 фрагмент од една комета се судрија со Јупитер, секој доволно моќен да предизвика масовно изумирање доколку ја погодеше Земјата. Јупитер ги прими сите удари.
Неговата огромна гравитација ја спаси нашата планета од безброј космички судири. Без него, Земјата би била изложена на многу повеќе удари, а животот каков што го знаеме можеби никогаш не би опстанал.
Во нашиот Сончев Систем огромното гравитационо поле на Јупитер ги одвлекува кометите и астероидите подалеку од нашата нежна, карпеста планета.
Но, ова гравитационо поле може да доведе помали планети во ризик да бидат целосно исфрлени од своите орбити.
– Тука, на Земјата, од астероиди нè штити Јупитер – вели астрономот Дени Прајс од Универзитетот „Кертин“ во Австралија.
Според ново истражување објавено во списанието „Астрономикал журнал“, малите карпести егзопланети слични на Земјата навистина можат да бидат исфрлени поради гравитациониот ефект на големите гасовити џинови како Јупитер.
Научниците го проучувале далечниот ѕвезден систем ХД 141399, кој има четири гасовити џинови поставени далеку од својата ѕвезда. Тоа го прави добар модел за нашиот Сончев Систем бидејќи и Јупитер и Сатурн се оддалечени од Сонцето.
Користејќи компјутерски симулации на системот, истражувачите откриле дека Земјата веројатно не би можела да остане во истата орбита во која настанала доколку се наоѓала таму, поради гравитациските влијанија на гасовитите џинови.
Јупитер е петтата планета од Сонцето, оддалечена околу 780 милиони километри од нашата ѕвезда. Со дијаметар од приближно 140.000 километри, Јупитер е околу 11 пати поширок од Земјата.
Истражувањата потсетуваат колку навистина сме среќни што постоиме бидејќи покажуваат колку е малку веројатно една карпеста планета да се најде во ваква зона и притоа да има голем планетарен штит како Јупитер.
Во суштина, овие трудови укажуваат дека е исклучително ретко да се најде вистинскиот збир на услови за живот некаде во универзумот.
– Нашето истражување ни дава уште повеќе причини да бидеме благодарни за специфичната конфигурација на планетите во нашиот Сончев Систем – велат научниците.
