Безжичната технологија од шестата генерација, или 6Г, е еден чекор поблиску до реалноста по веста дека кинеските истражувачи го претставија првиот 6Г чип во светот со „целосна фреквенција“. Чипот е способен да испорача брзини на мобилен интернет над 100 гигабајти во секунда (Gbps) и е развиен од тим предводен од научници од Пекиншкиот универзитет и Градскиот универзитет во Хонгконг.
6Г-технологијата е наследник на 5Г и ветува дека ќе направи огромен скок во начинот на кој комуницираме. Ќе понуди придобивки како што се ултрабрза поврзаност, ултраниска латентност и интеграција со вештачка интелигенција, што може да управува и оптимизира мрежи во реално време. За да се постигне ова, 6Г-мрежите ќе треба да работат низ широк опсег на фреквенции, од стандардни микробранови до многу повисоки терахерцни бранови. Сегашната 5Г-технологија користи ограничен сет на радиофреквенции, слични на оние што се користеа во претходните генерации на безжични технологии.
Новиот чип е со димензии 11 милиметри на 1,7 милиметри. Работи во широк фреквентен опсег, од 0,5 гигахерци до 115 гигахерци, што традиционално бара девет одделни радиосистеми за да се покрие овој спектар.
– Нашиот систем претставува значаен чекор кон идните безжични мрежи со целосен спектар. Ова овозможува реконфигурабилни безжични комуникации со целосен линк со подобрен пропусен опсег, брзини на пренос на податоци и функционалност на системот, во споредба со претходните безжични демонстрации со фотонска помош – коментирале истражувачите во нивниот труд објавен во списанието „Нејчр“.
Една од главните иновации на тимот беше пакувањето на сите важни делови од безжичниот систем во еден мал чип направен од материјал наречен тенок филмски литиум ниобат (ТФЛН). Конвенционалните системи бараат неколку одделни компоненти за секоја задача.
Чипот, исто така, користи иновативен метод за генерирање и пренесување сигнали. Прво, широкопојасен електрооптички модулатор ги претвора безжичните сигнали во оптички, кои потоа се пренесуваат низ оптоелектронски осцилатори за да се генерираат потребните радиофреквенции. Осцилаторите користат светлина и електрична енергија за да создадат стабилни, чисти сигнали што се протегаат од микробранови до терахерцови бранови. Во тестовите, системот постигнал приспособување на фреквенцијата од 6 гигахерци за 180 микросекунди, многу побрзо од сегашната технологија.
Кога доаѓа 6Г?
Иако развојот на еден чип со сите фреквенции е значаен пробив, технологијата е сè уште во раните фази на развој. Многу експерти очекуваат дека комерцијалните 6Г-мрежи ќе почнат да се воведуваат околу 2030 година.
