Македонските граѓани во текот на 2025 година во казина, обложувалници и автомат-клубови потрошиле околу 2,8 милијарди евра, покажува анализа презентирана во емисијата „Бизнис објектив“. Висината на оваа сума отвора сериозни прашања за навиките на трошење, економскиот притисок врз домаќинствата и, пред сè, за распространетоста на проблематичното коцкање.

Експертите одамна предупредуваат дека коцкањето не е само „забава“, туку ризик кој кај дел од граѓаните може да прерасне во зависност со тешки последици: финансиски долгови, нарушени семејни односи, пад на продуктивноста и ментално здравје. Кога бројките достигнуваат милијарди, прашањето веќе не е индивидуално, туку општествено — колку државата, институциите и самата индустрија вложуваат во превенција, контрола и поддршка за оние што се соочуваат со зависност.