Премиерот Христијан Мицкоски соопшти дека во Њујорк разговарал со американскиот државен секретар Марко Рубио, оценувајќи ја средбата како важна за натамошно зајакнување на односите меѓу Македонија и САД.
„Во Њујорк разговарав со државниот секретар на Соединетите Американски Држави, Марко Рубио. Овие разговори имаат особено значење и претставуваат потврда на важноста на стратешкото партнерство и континуираниот политички дијалог со Соединетите Американски Држави.“ напиша премиерот.
„Директната комуникација на високо политичко ниво е важна можност за размена на ставови за прашањата од заеднички интерес, за продлабочување на билатералните односи и за натамошно зајакнување на нашата позиција како стабилен и доверлив сојузник.“, истакна Мицкоски.
Во својот пост, премиерот се осврна и на актуелниот геополитички контекст, нагласувајќи дека во период на сериозни предизвици, силните партнерства и отворениот дијалог со стратешките сојузници имаат особено значење.
Тој рече дека Македонија има јасно дефинирани државни интереси и дека продолжува да ги застапува „достоинствено и принципиелно“ заедно со своите стратешки партнери.
„Продолжуваме да го јакнеме македонско-американското стратешко партнерство и да создаваме нови можности.“, напиша Мицкоски.
