Американскиот амбасадор во Приштина Џефри Ховениер изјави дека САД имаат две барања до Владата на Косово – да не инсистира градоначалниците да работаат од општинските згради и полицајците да се повлечат од трите општински згради на северот од Косово.

„Не разбираме зошто алтернативните локации или други јавни згради не можат да се користат за извршување на нивните функции“, рече Ховениер.

Американскиот амбасадор го наведе примерот со градоначалниците на северот кои даваа заклетва на алтернативни локации.

„Сметаме дека присуството на косовската полиција во зградите во кои насилно влезе е многу предизвикувачко, затоа побаравме од владата да ја повлече полицијата од овие три општински згради“, рече американскиот дипломат.

Според амбасадорот, преземањето на овие чекори ќе помогне да се намалат тензиите.