bandr
Струмица

(ИНТЕРВЈУ+ФОТОГАЛЕРИЈА) Струмичанката Ана Гаврилова кафето го претвора во уметничка слика!

За креативниот ум нема лимит, сè може да биде уметност, во сè може да се најде инспирација за творење и креација. Секојдневното пиење кафе е рутина во која сите уживаме, но струмичанката Ана Гаврилова на кафето му пристапила како материјал и од него создала уметност. Таа дипломирала на Економскиот факултет „Св. Кирил и Методиј“ во Скопје на отсек е-бизнис, но како што откри во разговор со Струмица Денес уште од најрани години ужива во несекојдневните и креативни нешта.

СТРУМИЦА ДЕНЕС: Кога и како започна со овој тип на уметност?

АНА: Отсекогаш сум уживала во уметноста, ги сакам креативните работи и сакам да создавам несекојдневни нешта. Можеби затоа што сум израсната во фамилија која ги почитува уметноста и музиката. Уште како мала се сеќавам како седевме мирни и гледавме од далеку со брат ми затоа што татко ни цраташе. Тоа сигурно влијаело и кај брат ми. Тој сега е дипломиран вајар на факултетот за ликовно уметности. Но оваа техника е прилично нова за мене, односно започнав со самиот мој ноемвриски предизвик. Сведоци сте на тоа како ја тестирам и изучувам техниката за цртање со кафе секој ден.

СТРУМИЦА ДЕНЕС: Од каде инспирацијата?

АНА: Инспирација секогаш доаѓа од секојдневието… Од луѓето околу мене, од оние што ги сакам, од нештата што ги сакам, од прекрасните бои на природата.. Интересно е како бојата на кафето совршено се совпаѓа со есенските бои.

СТРУМИЦА ДЕНЕС: Како реагираат луѓето кога го гледаат твоето творештво?

АНА: За мое изненадување и задоволство добивам доста позитивни коментари од луѓето. Се радувам кога некој ќе ми каже дека бил инспириран од моите цртежи и ќе ме пофали или пак едвај чека да види што ќе нацртам наредниот ден. Ми предлагаат што да цртам или пак ми даваат совети.

СТРУМИЦА ДЕНЕС: Имаш ли некакви планови за во иднина? Планираш ли да се занимаваш професионално со овој тип уметност?

АНА: Засега ова е само мое ноемвриско хоби, но не се знае што може да се случи утре. Тоа што знам е дека ќе се трудам и настојувам секогаш да одвојам дел од моето време за тоа што ме прави вистински среќна и тоа што ми го раздвижува умот.