Градоначалникот на општина Струмица, Костадин Костадинов, најави формирање на Планинска спасувачка служба во општината како дел од напорите за зголемување на безбедноста во планинските предели и поддршка на развојот на туризмот.
„Пред два месеци, на средба со членовите на Алпинистичкиот клуб ‘Скала’, разговаравме за потребата од формирање на систем за планинско спасување во нашата општина. Овој систем ќе го зголеми нивото на безбедноста на граѓаните и ќе придонесе за развојот на алтернативниот и планински туризам“, изјави градоначалникот Костадинов.
Тој потсети дека на истата средба беше потпишан меморандум за соработка со Алпинистичкиот клуб „Скала“, кој е член на Националниот сојуз за спасување на Македонија, што практично постави основа за формирање на Планинската спасителна служба во општина Струмица.
„Денес, на нова средба, предложивме дека на секој следен состанок на Локалниот совет за превенција ќе учествува и претставник од Планинската спасителна служба. Ова ќе овозможи нивно активно учество во работата на советот и ќе допринесе за зголемување на заштитата на граѓаните“, додаде Костадинов.
Со ова, Струмица ќе се вклучи во редот на општини кои имаат своја планинска спасителна служба, што ќе биде важен чекор за подобрување на безбедноста и развојот на планинскиот туризам.
