Јавното претпријатие за комунални дејности „Комуналец“ – Струмица соопшти дека повторно се соочува со несоодветно однесување на поединци кои со своите постапки ја загрозуваат животната средина.
На патот кон Цареви Кули, непознато лице оставило мртва, полураспадната крава. Сцената предизвикала револт и згрозување кај граѓаните и активистите кои секојдневно се вклучуваат во активностите за чистење на диви депонии.
Екипите на „Комуналец“ веднаш интервенирале и го исчистиле местото, но од претпријатието порачаа дека ваквите појави претставуваат сериозен удар врз сите напори за создавање почиста и поздрава средина.
„Комуналец“ потсетува дека континуирано работи со граѓаните и невладините организации во насока на елиминирање на дивите депонии и апелира јавноста да покаже поголема совест и одговорност. Од претпријатието прашуваат дали на ваков начин може да се изгради свеста за почиста средина и што треба да се преземе за целосно да се спречат вакви несоодветни постапки.
