Православните верници денес го празнуваат споменот на Свети Анастасиј Радовишки, познат и како Свети Спасо Радовишки – новомаченик кој со својата вера и непоколебливост оставил длабока трага во духовното наследство на македонскиот народ.
ПРОДОЛЖЕНИЕ:
Роден во Радовиш во 1774 година, младиот Анастасиј на дваесетгодишна возраст бил испратен во Солун за да изучува занает. Таму бил изложен на силни притисоци да ја напушти православната вера и да прими ислам. И покрај суровите мачења, тој не се поколебал и останал верен на Христа.
На 11 септември 1794 година, по жестоки измачувања, тргнувајќи кон бесилката подготвена за него, изморениот Анастасиј паднал и ја предал својата душа на Господа. Неговата жртва го направи пример за непоколеблива вера и духовна сила, а црквата го вброи меѓу новомачениците.
По неговата маченичка смрт, преподобниот Никодим Агиорит го запишал неговото житие, со што ликот и делото на овој млад светец останале трајно врежани во духовната историја.
Со празнувањето на Свети Анастасиј Радовишки, верниците се потсетуваат на значењето на верата, истрајноста и духовната жртва.
