Утрово седумчлена експедиција од Македонија тргна кон Чиле, со јасна цел, искачување на повеќе врвови во Андите, меѓу кои и моќниот Ојос Дел Саладо. Особено се издвојува учеството на струмичанецот Благој Ѓузелов, член на планинарскиот клуб „Ентузијаст“, кој заедно со својот сограѓанин Никола Матушко ќе ја претставуваат Струмица на ова големо алпинистичко искушение.

Експедицијата има амбициозен план да освои неколку високи андински врвови, а централна цел е Ојос Дел Саладо – највисокиот вулкански врв на светот, висок 6.893 метри, сместен над суровата пустина Атакама.

Учесниците ќе се соочат со екстремни услови, големи надморски височини и сериозни физички и психички предизвици.

За Благој Ѓузелов и Никола Матушко ова претставува нов, исклучително значаен чекор во неговото планинарско искуство и силна професионална и лична мотивација. Нивното учество е гордост не само за планинарскиот клуб „Ентузијаст“, туку и за целата струмичка заедница.

Доколку планот се реализира успешно, искачувањето на Ојос Дел Саладо ќе биде забележано како еден од позначајните подвизи на македонските планинари.