Министерот за здравство Азир Алиу објави дека во рекордно време се реализирани повеќе од 1.250 нови вработувања во 85 јавни здравствени установи низ државата, како дел од стратегијата за кадровско зајакнување на здравствениот систем.

Алиу истакна дека паралелно се спроведува и процесот за вработување на приватните специјализанти, со што конечно се решава долгогодишниот проблем со нивниот статус. „Самостојниот синдикат за здравство е наш партнер со кој заеднички работиме на унапредување на условите и правата на здравствените работници“, изјави министерот.

Покрај новите вработувања, Владата овозможи и значително зголемување на платите: сите здравствени работници добиваат по 4.815 денари нето повеќе, а медицинските сестри добиваат зголемување од 6.200 денари.

Заменик министерот Јовица Андовски додаде дека Министерството за здравство останува отворено за соработка со синдикатите. „Го почитуваме достоинството на докторите и целиот персонал кои се грижат за здравјето на граѓаните. Заедно ќе продолжиме да ги решаваме сите предизвици за подобра иднина и за здравствените работници и за пациентите“, рече Андовски.