Владина делегација предводена од премиерот Христијан Мицкоски денеска изврши увид во текот на реконструкцијата на црквата „Свети Кирил и Методиј“ во Струмица, проект кој се реализира со поддршка од Министерството за култура. Делегацијата ја пречека викарниот Епископ Стобиски г. Јаков.
Во состав на делегацијата беа министерот за култура Зоран Љутков, директорката на Управата за заштита на културното наследство Весела Честоева, потпретседателот на Собранието Антонио Милошоски, директорот на Завод и музеј – Струмица Бранко Горгиев, директорот на НУЦК „Антон Панов“ Драган Маџиров, како и пратеници во македонското Собрание, општински советници и претставници на голем број институции.
За реализација на основниот конзерваторски проект за црквата „Св. Кирил и Методиј“ во Струмица е обезбеден буџет од 15 милиони денари. Министерството за култура ќе учествува и со 1,2 милиони денари за санација на кровот на манастирот „Св. Леонтиј“ во селото Водоча.
Посетата имаше за цел да се согледаат досегашните активности и динамиката на изведбата, со што се овозможува зачувување на значајното духовно и културно наследство на Струмичкиот регион.
